Whenever, wherever !

Deishar un comentari

Lo forum sus ton smartphone ! Dens la rua o avans lo rendetz-ve dab Paul d’En-Bòsc, pòdes guardar un uelh sus l’actualitat occitana ! E òc ! Es aquò la modernitat ! Bon es pas enqüèra perfèit, mes i a de l’ideia !

Advertisements

Setmana 20 de 2010

Deishar un comentari

De que s’es passat aquesta setmana suu forum Occitània ? Enfin, de que s’es passat las duas o tres setmanas passadas… Ben òc, quan se debana pas gran causa, es mauaisit de trobar de que díser… Mes aquesta setmana, i a un fum d’eveniments, virtuaus o non de senhalar !

Coneishetz Ubuntu ? Non ? Ubuntu es una version accessibla de Linux, lo sistema d’espleitacion informatic libre e a gratís. Ubuntu es una version Linux for Human being (es l’eslogan oficiau), es a díder un Linux hèit entaus umans… Vertat que i a quauquas versions de Linux que semblan gessidas deu cerveth d’un extraterrèstre o d’un episòdi de la seria Doctor Who… Ubuntu es donc una version de bon compréner, a gratís, e … en occitan !!!! L’associacion Tot en òc s’es encargada de har la revirada ! Mercés ad eths, podetz aver lo vòste ordinator dens la vòsta lenga preferida ! Per aver mei d’informacions sus Ubuntu, lo site en francés (existís pas enquèra en occitan). Lo subjècte suu forum Occitània aquí.

Entà demorar dens lo Ciber-Cafè, èi lo plaser de’vs presentar lo navera revista nascuda dens l’Occitània virtuau : La Criiisi. Tot lo monde n’en parla dejà !

“La Criiisi es sociala, ecologica, democratica !” Olivièr B., revolucionari

Bendas dessenhadas, tèst a-la-con, roman fòto,… Lèu, lo blòg s’aquarrirà ! E perque pas, dab lo temps e l’escaduda, una version papèir ? Sus lo forum.

29 de mai 2010Lo 29 de mai, a 21h a Rébénacq (a costat d’Arudy), serada concert dab l’associacion Alandar. Serà lo parat de descobrir lo grop de reggae Toni’s Familiy.

Èm enqüèra a esperar lo programa de l’Estivada de Rodés e a pronosticar en escambiar vejaires mei o mensh escuranhós. Aquí.

Coma ic sabetz, David Grosclaude es estat elegit a la region Aquitània e deishè l’I.E.O. qu’a donc un naveth president : Pierre Brechet. Lo subjècte aquí.

La comuna de Casalís en Sud Gironda s’es aviada dens l’aventura de la senhalizacion bilingua. Dab sonque 215 poblants, e shens nat putz de petròli, se podem díder que l’emplec de la lenga es mei que tot un ahar de volontat politica, e non pas e moneda. Las fotografias aquí.

Entà acabar, vos agrada lo rock ? Vos agrada l’òc ? Alavetz aimaratz Jean-Marc Leclercq, gran musician que canta en occitan. Aquí.

Anem, bona setmana, e n’avetz pas a prémer, vos cau insríver suu forum !!

Setmana 17 de 2010

1 comentari

Bon, de còps, es atau, que pòt arribar : se debana pas ren ! S’es pas passat que-que-sia suu forum. I pòdi pas ren ! Desencusatz me ! Soi pas sosmés a rentabilitat ! Urosament ! Soi pas jornalista, èi pas besonh de vénder mon papèr. L’adreça deu diccionari francés/occitan en linha de Mertyl a cambiat, vaquí la navèra : www.occitanews.com

Lo grop Mauresca Fracas Dub es a petaçar un navèth album. Com los 3 purmèrs, es autofinançat. Podetz enqüèra participar a l’aventura en crompar l’album en soscripcion aquí

Setmana 16 de 2010

Deishar un comentari

Lo que me conto abuellito...

Lo que me conto abuellito...

Adishatz a tots e planvenguts per aquèth dusau bulletin deu forum Occitània !!

Dejà, podetz començar en notar la data deu 3 de mai, a Arudy, en Bearn on se harà una projeccion deu film Lo que me conto abuellito…, un film sus l’emigracion bearnèsa en Argentina. Lo projeccion es organizada per l’Associacion Alandar e la comuna d’Arudy. Lo subjècte suu forum.

Una estudianta englèsa de l’Universitat de Nottingham, es vengunda nos pausar la question seguenta : Au vòste vejaire, a quin punt e de quin biais Internet ajuda l’occitan ? Daubuns an ensajat de balhar lo lor punt de vista sus la question, mes s’avetz la vòsta idèia sus l’ahar, e qu’etz pas enqüèra marcats suu forum, es benlèu l’escadença d’ic har aquí

Barsac, vilòta de Sud Gironda, sus la riba esquèrra de Garona, es coneishuda pr’amor deus sons vins blancs licorós vesins deus de Sauternas. Ara, serà tanben coneishuda dens lo mitan occitanista (e alhors !) pr’amor de la soa Calandreta. Es oficiau, la Calandreta de Barsac dubrirà au mes de seteme de 2010. Podetz léger l’article de Sud Ouest aquí

Deu costat deu mètro tolosan, l’optimisme es pas d’actualitat. Sabetz benlèu pas, mes despuish lo hestenau Occitania d’aquesta annada, lo mètro parla en occitan. Podetz audir las anoncias suu blòg Sens Titol. S’escotatz, podetz jutjar de la qualitat sonoras de las anoncias, e de vertat, son pas de bona qualitat, e s’ameritan una amelioracion. Un grop Facebook s’es pujat entà ahucar aquèra votz, au nom deu progrés, e de la libertat,…), la CNT-AIT tolosana critica lo hèit que sia un reget racista deus que son gessits de país on se parla pas « patois » (sic), enfin, l’ahar hè polemica. Tisséo, la societat que s’encuenta deus transpòrt publics dens l’agglomeracion mondina, aprep aver promés una perenisacion de la causa, es a tornar sus la soa decision. Pr’amor d’aquò, lo 28 de mai, lo collectiu Tisseòc (que sosten l’iniciativa) apèra a la mobilisacion. Lo Subjècte.

Marxelin seveish enqüèra dens la rubrica Discari. Aquèsta setmana, e’ns a trobat un grop provençau : Tamb-Rock. Vòli precisir que los administrator deu forum son pas responsables de las publicacions de Marxelin. Vòli precisir tanben que lo forum Occitània !! non s’es pas jamei engloriolat de har descubrir çò que Occitània hè de melhor, mes çò que Occitània hè, tot simplament…
Entà acabar aqueth bulletin, me pòdi pas empachar de’vs har partatjar la quintaesséncia deu lirisme occitan contemporanèu :

Danissonet

Un pauc de sal,
Un pauc de mèl
Dins la sang, dins la pèl

Per quala filha ? Quala lei ?
Saique un rei ?

D’uèi o deman
Qual o dirà ?
Un jorn, un cant
De tèrra sortirà

Coma un camin,
Coma una votz
De luènh, de luènh

Dins on agach,
Dins cada mot
Bufa lo vent

Danissonet
De Lemosin
D’uèi per qual combat
Vos podriatz levar ?
Vos podriatz levar ?
E l’òmi

Marxelin

Setmana 15 de 2010

5 Comentaris

Adishatz a tots e planvengut per aquèth purmèir numèro deu Blòg deu forum Occitania !! Aquí, cada setmana, vos poiratz assabentar de çò que’s disó suu forum de discutida lo mei popular deu web occitan. Alavetz adara, los timidós que gausan pas se fretar au monde virtuau, los qu’an pas lo temps, los qu’an pas jamei capitat de se marcar suu forum, aquèth blòg es hèit per vosautes.

Aquesta setmana, avem avut un desbat ahuecat sus la question deu site panOccitan. Vertadèirament criticat dens lo mitan occitan, es totun un deus sites web los mei populars pr’amor deu son interfaci agradiu. Perque tant de hasti ? Perque a maugrat d’acò es  tant popular ? N’en saber mei aquí.

Un site gessit de panOccitan estò presentat per Drac : L’Elucidari. Qu’es acò l’Elucidari ? Una mena de Wikipedia, mes pas anomima, pas censurada,… Lo subjècte.

Laurent, un navèth membre deu forum es vengut sollicitar la nòsta ajuda entà revirar lo site web MOVIM, que serà un naveth hialat sociau. Maime s’es encargat de l’i balhar una version lemosina, Cerièra de Mai s’es encargada de la version lengadociana e ua version gascona estó tanben sosmesa. Fin finau, pr’amor d’una constrenta tecnica, poden pas préner en compte cada dialècte. Serà donc la version lemosina que serà utilizada. Aquèth ahar e’ns permetó de tornar descubrir lo Termcat, un lexic de las navèras technologias e de l’Internet hargat per la Generalitat de Catalunya Lo subjècte aquí.

Mercés a Marxelin,  la rubrica musicau deu forum (lo Discari) es un lòc on se pot trobar çò que la cultura occitana hè (atencion ! n’ia de béber e de minjar !). Aquesta setmana, e’ns hasó descubrir un grop lanés, Skatip, que hè deu trad mesclat d’un chic de rock. Dens aquèth subjècte, poiratz tanben descubrir dus autes grops lanés : Que Quiò e Rock’n’Trad Lo subjècte.

Demoram dens lo musicau, mes aquèth còp d’un punt de vista mei critic (çò que’ns desagrada pas). Marilis Orionaa, cantaira bearnèsa, s’es encuentada deu grop Nadau. Picatz.

Jornadas Occitanas 2010

Jornadas Occitanas 2010

Lo Med’Òc-Bordèu organizarà los 23 e 24 d’abriu un hestenau occitan a l’universitat Bordèu 3 – Michel de Montaigne. Lo Med’Òc, es lo Moviment deus Estudiant Occitans, una associacion estudianta presenta a Pau, Montpelhier e Bordèu. Lo programa de las jornadas es charjat ! Concerts (Mauresca Fracas Dub, Gojats of Hedàs,…), projeccion de film (Las Sasons de Pamela Varela), taulas redondas, visita de Bordèu en occitan,  balèti,…  Que’u podetz trobar aquí suu forum. Lo MySpace.